శాంసంగ్‌ నుంచి కొత్త 5జీ ఫోన్‌.. ధర రూ.19,999 నుంచే.. ఫీచర్లు ఇవే!

స్మార్ట్‌ఫోన్‌ మార్కెట్‌లో శాంసంగ్‌ మరో కొత్త ఫోన్‌ను విడుదల చేసింది. గెలాక్సీ ఎఫ్‌70 సిరీస్‌లో భాగంగా శాంసంగ్‌ గెలాక్సీ ఎఫ్‌70 5జీని ఆదివారం భారత మార్కెట్‌లోకి తీసుకొచ్చింది. ఇప్పటికే అందుబాటులో ఉన్న గెలాక్సీ ఎఫ్‌70 ప్రో 5జీ, ఎఫ్‌70ఈ 5జీ మోడళ్లకు ఇది అదనం. ఈ ఫోన్‌ అక్టోబర్‌ 20 నుంచి ఫ్లిప్‌కార్ట్‌లో విక్రయానికి రానుంది. లాంచ్‌ ఆఫర్లతో కలిపి ప్రారంభ ధర రూ.17,999గా ఉండనుంది. 5,000mAh బ్యాటరీ, 50 మెగాపిక్సెల్‌ ప్రధాన కెమెరా, సూపర్‌ అమోలెడ్‌ డిస్‌ప్లే ఈ ఫోన్‌లో ప్రత్యేక ఆకర్షణలు.

శాంసంగ్‌ గెలాక్సీ ఎఫ్‌70 5జీ రెండు ర్యామ్‌-స్టోరేజ్‌ వేరియంట్లలో లభిస్తుంది. 4జీబీ ర్యామ్‌, 128జీబీ స్టోరేజ్‌ మోడల్‌ ధర రూ.19,999గా నిర్ణయించారు. 6జీబీ ర్యామ్‌, 128జీబీ స్టోరేజ్‌ వేరియంట్‌ ధర రూ.22,999. ప్రారంభ ఆఫర్లతో బేస్‌ మోడల్‌ను రూ.17,999కే కొనుగోలు చేయవచ్చని కంపెనీ తెలిపింది. బోల్డ్‌ బ్లాక్‌, వివిడ్‌ వయోలెట్‌ రంగుల్లో ఈ ఫోన్‌ అందుబాటులో ఉంటుంది.

ఈ స్మార్ట్‌ఫోన్‌లో 6.7 అంగుళాల ఫుల్‌ హెచ్‌డీ ప్లస్‌ ఇన్ఫినిటీ-యూ సూపర్‌ అమోలెడ్‌ డిస్‌ప్లే ఇచ్చారు. ఇది 90Hz రిఫ్రెష్‌ రేట్‌కు మద్దతు ఇస్తుంది. స్క్రీన్‌కు కార్నింగ్‌ గొరిల్లా గ్లాస్‌ విక్టస్‌ రక్షణ ఉంది. ఆక్టా-కోర్‌ ఎగ్జినోస్‌ 1330 ప్రాసెసర్‌తో పనిచేస్తుంది. దుమ్ము, నీటి తుంపర్ల నుంచి రక్షణ కోసం ఐపీ54 రేటింగ్‌ కూడా ఉంది.

కెమెరాల విషయానికి వస్తే వెనుకవైపు మూడు కెమెరాలు ఉన్నాయి. ఇందులో 50 మెగాపిక్సెల్‌ ప్రధాన కెమెరా, 5 మెగాపిక్సెల్‌ అల్ట్రావైడ్‌ కెమెరా, 2 మెగాపిక్సెల్‌ మాక్రో కెమెరా ఉన్నాయి. సెల్ఫీలు, వీడియో కాల్స్‌ కోసం ముందు భాగంలో 13 మెగాపిక్సెల్‌ కెమెరా ఇచ్చారు.

బ్యాటరీ సామర్థ్యం 5,000mAh. దీనికి 25W వైర్డ్‌ ఫాస్ట్‌ ఛార్జింగ్‌ సపోర్ట్‌ ఉంది. మైక్రోఎస్‌డీ కార్డు ద్వారా స్టోరేజ్‌ను 2టీబీ వరకు పెంచుకోవచ్చు. 5జీ, 4జీ, ఎల్‌టీఈ, వైఫై, బ్లూటూత్‌, యూఎస్‌బీ టైప్‌-సీ, జీపీఎస్‌ కనెక్టివిటీ సదుపాయాలు ఉన్నాయి. ఫోన్‌ మందం 7.5 మిల్లీమీటర్లు.